TSJERKWERT/DEDZJUM – Op sneon 6 septimber organisearret K.F. De Twa Doarpen de tradisjonele ôfsluting fan it keatsseizoen. Net allinnich leden, mar ek (âld-)Tsjerkwerders binne fan herte wolkom om mei te dwaan oan in sportive en gesellige dei fol aktiviteiten.
It programma begjint om 13.00 oere mei it keatstoernoai foar senioaren. Dielnimmers moatte op 1 jannewaris fan dit jier 14 jier of âlder wêze en kinne har oant freed 5 septimber, 20.00 oere, opjaan. De ynlis bedraacht € 3,- per persoan.
Fan 15.00 oant 17.00 oere stiet der ek in jeu de boules- en foljebaltoernoai op it programma. Dielname stiet iepen foar elkenien fan 14 jier en âlder, mei in ynlis fan € 2,-. Opjaan kin by de feriening fia 06-34077904.
Nei de sportiviteiten is der tusken 17.30 en 19.30 oere gelegenheid om te iten. Op it menu steane ûnder oaren in broadsje hamburger, twa stokjes saté of in broadsje shoarma. Opjaan is dêrfoar net nedich.
Om 19.30 oere folget de priisútrikking, dêr’t ek de kompetysjeprizen útrikt wurde. De dei wurdt om 23.00 oere ôfsluten mei it lêste rûntsje.
De aktiviteiten wurde mooglik makke troch de stipe fan JA Bouwhistorie en Restauratieadvies.
It bestjoer fan K.F. De Twa Doarpen, besteande út Michiel de Jong, Elske van der Meulen, Hidde Lemstra, Ids Walsma, Femke Boonstra, Thomas Huitema en Ype Bote Bonnema, hopet op in grutte opkomst en in gesellige sportdei.
