Grandioaze foarstellings Iepenloftspul De Beabuorstermole en de striid tsjin it wetter…

Wat mear as tsien jier lien begie as dream waard ôfrûne sneon 17 en snein 18 juny dan echt werklikheid. Unyk lokaasje-teater by de Beabuorstermole yn Tsjerkwert.

‘It binne dreamen famke! Jonkje. Mejuffrouw! Woeste wylde dreamen!´

Mei corona der tuskentroch hawwe wy in lange oanrin hân. Nei mear as trije jier tariedings gie it dan dochs oan! It stik betocht troch Jan Nota en Jan Witteveen en bewurke troch Romke Gabe Draaijer waard opfierd.

Mear as as fiifentweintich partijen soargen der mei harren stipe yn jild as materialen foar dat it mooglik wie. Yn it foar en rûnom de foarstellings wiene der in protte helpers aktyf. Dekôrstikken en tribune opbouwe, it ferkear begeliede, materialen leverje, sopsiede, efter de bar, tefolle om op te neamen.

‘Eltse stim, elts lyts radarke yn in goeie klok, helpt mei om de tiid oan te jaan.’

Wat hawwe wy twa grandioaze foarstellings hân. Kompleet útferkocht. Dat wol sizze mear as 640 besikers oer twa foarstellings ferdield. En soepele útfierings wêr’t alles krekt op syn plak foel sa as yn it foar betocht troch regisseur Hillie Altenburg, diriginte Jeanette Valkema en de kommisje.

Beide dagen wie der in gesellige neisit op en top fersoarge troch ’t Waltahûs mei al har frijwilligers. It waar koe net better, lekker waarm en sels de wyn joech him ûnder de útfierings del.

Mear as tweintich spilers fan jong oant âld skitteren op it toaniel. Sa ek de muzikanten fan fanfare Eensgezindheid. Der wie in machtich moai publyk wat goed yn it ferhaal siet. En de super strakke organisaasje soarge derfoar dat alles soepel ferrûn.

Yn it foar waard der troch de Leeuwarder Courant en it Friesch Dagblad positive oandacht skonken oan dit barren. Lykas de resinsjes nei de tiid wêr’t wy goed oer te sprekken binne.

We sjogge werom op in geweldich evenemint. We hawwe mei alle spilers en helpers wat ûnferjitliks delsetten. Einliks net te beskriuwen. Tankewol allegear.

Video Erik Leyder Havenstroom

Jierren lyn hiene wy it der al ris oer. Wat soe it dochs moai wêze lokaasje-teater út te fieren by de Beabuorstermole yn Tsjerkwert. Wy hawwe der wurk fan makke en in moai Frysktalich stik skreaun.

Ynspiraasje
By it skriuwen fan it stik hawwe wy in soad gebrûk makke fan besteand wurk. Besteand wurk fan en oer bygelyks âld-mealders Pier Zijsling en Wyberen Koopmans. Wurk fan Gerben D. Wijnja en Jouke Hylkema. In soad fan dit wurk is te finen op de webside www.tsjerkwert.nl. Derneist hawwe wy ynspiraasje opdien út besiten oan de mole en it gebiet derom hinne.

Sjueryrapport Gouden Gurbes 2023